ҰБТ туралы бейнеролик     Биылдан бастап мемлекеттік гранттар беру бағдарламаларының топтары бойынша бөлінеді. Пәндер комбинациясы мен сәйкесінше білім беру бағдарламалары топтарының көлемін төмендегі бейнероликтен көре аласыздар.  

Қостанайда Жастар жылы аясында Қазақстан Республикасының Президенті Қасым-Жомарт Тоқаевтың қатысуымен 1000-нан астам жастардың басын біріктірген Қазақстандық-Ресей жастар форумы болды. Форумның ашылуы жастар сарайының жаңа ғимаратында өтті. Ашылу салтанатында Қостанай облысының әкімі Архимед Мұхамбетов облысымызда 170 мыңнан астам жас буын өкілдері тұратынын айтты және оларды әлеуметтік қолдауға барлық жағдай жасалғанын ескертті: «Осы форум арқылы біз ғасырлар бойы ұласып келе жатқан көршілік қарым-қатынасымызды, достығымызды жалғастырамыз. Қазақстандағы жастар саясатының негізгі басымдылықтары - жастарды жұмыспен қамтуды әлеуметтік қолдау. Еліміз-дің өзге өңірлеріндегі сияқты біздің аймақта да «Дипломмен ауылға» бағдарламасы ойдағыдай жүзеге асуда. Осы уақытқа дейін 4000-ға жуық жас маман мемлекет тарапынан қолдау тапты. Бүгінде жастар инновациялық бизнес идеяларын қалыптастыру үшін үлкен мүмкіндіктерге ие. Кез-келген салада көшбасшы болу үшін жаңа жағдайларға бейім-деле білу керек. Өткен жылы аймағымызда «Цифрлық Қазақстан» бағдарламасының аясында IT лицейі ашылды. Бұдан басқа, Қостанайда бірегей жоба - «Жастар Алтын кітабы» бар, оған басқа адамдарға үлгі бола алатын жастар кіреді. Мүмкін осында отырғандар болашақта аталмыш тізімге қосылады». Жастар сарайы негізінде Қостанай облысының жастарға қызмет көрсету орталығы ашылды. Бұл алаң бизнес, білім беру, денсаулық сақтау, мәдениет, жергілікті атқарушы органдардың өкілдерімен, депутаттармен, табысты адамдармен кездесулер үшін құрылған. Әрбір жасөспірім мұнда келіп, өзін қызықтырған сұрақтарына жауап таба алады және өз ісін дамытуға кеңес ала алады. Ашылу салтанаты күні қоғамдық қабылдауда ҚМУ ректоры Алма Досжанова жастарға білім, жұмысқа орналасу және университетке қабылдау ережелері туралы кеңес берді. Форумның екінші күні мемлекет басшысы Қасым-Жомарт Тоқаев жастармен кездесті. Президентке көрме стендтері көрсетілді, бизнестің әлеуметтік жауапкершілігі, жастар саясаты туралы баяндалды, «Qazaqstan sulary» ОФ «Mensenemin»акциясымен таныстырды.  

А.Байтұрсынов атындағы Қостанай мемлекеттік университетінде  «Ұлағатты ұлы дала: рухани жаңғыру, білім және инновация» тақырыбында «Байтұрсынов оқулары – 2019» халықаралық ғылыми - практикалық конференция өтті. Бірнеше бөлімнен тұратын конференция барысында әртүрлі бағыттағы 100-ге жуық баяндама тыңдалды. Конференция қонақтары – РФ еңбек сіңірген ғылым қайраткері, экономика ғылымдарының докторы, профессор Иван Санду, Хорватияның Дубровник университетінің экономика және бизнес кафедрасының доценті, PhD Мария Бенич Пенава. Сондай-ақ «EBG gGmbH» кәсіптік және әлеуметтік білім беру мекемелерінің Еуропалық қауымдастығының уәкілі (Германия) Гаукс Вальтер, „ILE“ e. V. өңірлік дамуды алға жылжыту жөніндегі халықаралық қауымдастық өкілі Генрих Цертих болды. Аталмыш қауымдастық пен біздің оқу ордамыздың арасында ынтымақтастық туралы меморандумға қол қойылды. Конференцияның маңызы аса зор дейді қатысушылар. Бастысы, бұл - тәжірибе алмасу алаңы. Өйткені, ғылым – қай жерде де ғылым. Сондықтан, конференцияға мүшелік еткен Ресей мен Хорватия, Германия елдерінің жоғарғы оқу орындарында да ортақ мәселелер көп. Ол пікір алмасу барысында айқын көрініс тапты. Баяндама жасағандардың тіліне тиек болған түйткілдер – инновациямен қамтылу, заманауи білім мен ғылымға барынша басымдық беріп, білікті кадр даярлау ісін жаңғырту. Бұл ретте Қазақстанның мүмкіндігі мол, - дейді ғалымдар.  

Сәуір айының 22 күні А.Байтұрсынов атындағы Қостанай мемлекеттік университетінде кәсіподақ ұйымы мен жоғары студенттер кеңесінің қолдауымен «Мисс ҚМУ – 2019» сұлулық пен өнер байқауы өтті. Байқауға оқу ордамыздың ең сұлу да, инабатты 8 аруы қатысып, тәж үшін күресті. Байқау визитка, той көйлектер дефилесі, интелектуалды байқау, шығармашылық нөмір және кешкі көйлектер дефилесі сияқты бөлімдерден тұрды. Алғашқы бөлімде аруларымыз өздерін бейне-роликтер арқылы таныстырса, сайыс той көйлектер дефилесімен жалғасын тапты. Ал интелектуалды бөлімде сұлулар логиалық сұрақтарға жауап беру арқылы өздерінің ой-өрістерінің кеңдігін көрсете алды. Сайыскер қыздар «ҚМУ-нің сұлу бойжеткені» атағына лайықты екендерін әр түрлі сынақтарда байқатуға тырысып бақты, арулар ән шырқап, би билеп, түрлі аспаптарда да ойнап көрермендердің ықыласына бөленді. Байқау кешкі көйлектер дефилесі бөлімімен аяқталды. Байқауды қорытындылай келе әділқазылар алқасы, театр және кино актері Әлімхан Мырзахан, шоумен Рач Мартиросян және «Мисс Қостанай– 2017» Анастасия Данчева, «Thai market» дүкенінің директоры Оксана Зайнуллина, «Принцесс» той көйлектер салонының директоры Әлима Сәлімжанова шешімді бір ауыздан қабылдады. Байқау қорытындысы бойынша бойжеткендер түрлі номинациялар бойынша марапатталды: «Мисс спорт» – заң факультетінің 3 курс студенті Дана Оңайбаева, «Көрермендер көзайымы» – гуманитарлық-әлеуметтік факультетінің студенті Виктория Авгумбаева, «Мисс стиль» – витеренарлық және мал шаруашылығы технологиялары факультетінің студенті Дарина Батырыва, «Мисс интелект» – гуманитарлық-әлеуметтік факультетінің студенті Гаухар Мұратқызы, «Мисс талант» – заң факультетінің студенті Жадыра Шаненова. «Мисс ҚМУ – 2019»  тәжі Дана Оңайбаеваға, ал «Вице мисс ҚМУ – 2019» атағы Карина Аймухамбетоваға бұйырды. Байқауға қатысқан сұлуларымыздың барлығы да жеңіске лайық деп ойлаймыз, бірақ сайыс болған жерде жеңімпаз болады, сондықтан жеңілдім деп мойымаңыздар!  

22 сәуірден 25 сәуірге дейін Қостанай мемлекеттік университетінде Аккредиттеу және рейтингтің тәуелсіз агенттігінің(АРТА) сыртқы сараптама комиссиясы жұмыс істейді. Аккредиттеу және рейтингтің тәуелсіз агенттігі жоғары оқу орындарының бәсекеге қабілеттілігін арттыру үшін құрылған.  Аккредиттеу - университеттің жалпы білім беру сапасы немесе университеттің жеке білім беру бағдарламаларының сапасы халықаралық стандарттар мен критерийлерге сәйкестігін бағалау. 4 күн ішінде 20 адамнан тұратын комиссия университеттің қызметін толықтай зерттейді, оқу ғимараттарына барады, оқытушылармен, университет студенттерімен және жұмыс берушілермен кездеседі. Биыл гуманитарлық-әлеуметтік, аграрлық-биологиялық, ақпараттық технологиялар және заң факультеттерінің оқу бағдарламалары сыртқы бақылауға түседі.Комиссияны «Павлодар ауылшаруашылық эксперимент зауыты» ЖШС директоры, т.ғ.к.Уалханов Байжан Нұрбайұлы басқарады.

Бүгін А.Байтұрсынов атындағы Қостанай мемлекеттік университетінің мәжіліс залында «2019 жылғы Президенттік сайлау: рөлі мен маңызы» тақырыбында дөңгелек үстел өтті. Осы жылдың наурызында Н.Назарбаев өзінің Президенттік өкілеттілігін тоқтатқанын бәріміз білеміз. Ел конституциясының 48-бабының 1-тармағына сәйкес қалған мерзімде оның өкілеті парламент сенатының төрағасы Қасым-Жомарт Тоқаевқа көшті. Қасым-Жомарт Тоқаев 9 сәуірде мәлімдеме жасап, 2019 жылдың 9 маусымында өтетін Президенттік сайлау туралы жариялады. «Бұл кезектен тыс сайлау Қазақстан халқы мен әлемдік қауымдастық алдында қазіргі мемлекет басшысының заңдылығына қатысты белгісіздікке жол бермеу үшін қажет. Қазақстан Республикасы Президентінің кезектен тыс сайлауын өткізу – демократия қағидаттарына толық сәйкес келетін және елдің мүдделеріне жауап беретін маңызды, қажетті, дұрыс және уақтылы шешім». Бұл – дөңгелек үстелге қатысушылардың ойы. Олардың арасында Қостанай облысының Қазақстан халқы Ассамблеясы хатшылығының меңгерушісі, мемлекеттік емес ұйымдардың, кәсіподақ ұйымдарының басшылары, Қостанай облысының жоғары оқу орындарының магис-транттары мен докторанттары, республикалық және аймақтық бұқаралық ақпарат құралдарының өкілдері болды. Іс-шараны А.Байтұрсынов атындағы Қостанай мемлекеттік университетінің ректоры, Қостанай облыстық мәслихатының депутаты, «Nur Otan» партиясының Қостанай облыстық филиалының саяси кеңесінің мүшесі Алма Досжанова ашты:«Ел Президентінің сайлауы саяси бағыттың үздіксіздігі мен тұрақтылығын қамтамасыз етеді. Егемендіктің жылдары біздің дамуымыздың қазақстандық моделі оның тиімділігін дәлелдеді және бүкіл әлемде экономикалық өсу құндылықтарының, әлеуметтік тұрақтылық пен ұлтаралық келісімнің үлгісі ретінде танылды». «Дуслык» татар-башқұрт этномәдени бірлестігінің басшысы Ринат Бектемиров, «Азаматтық Альянс» ҚҚ төрайымы Динара Өтебаева,«Жас Атамекен» жас кәсіпкерлер клубының президенті Зарина Көкжанова, Қостанай облысындағы «Жаңғыру жолы» Қазақстан халқы Ассамблеясының Республикалық жастар қозғалысының төрағасы Руслан Мырзағалиев сияқты Қостанай облысының белсенді тұлғалары азаматтық жауапкершілік туралы айтты. Сондай-ақ олар Президенттік сайлаудыңқажеттілігі мен уақытылы өткізілуі туралы ойларын жеткізді. А.Байтұрсынов атындағы Қостанай мемлекеттік университетінің студенттері атынан сөз сөйлеген заң факультетінің 3 курс студенті, Қостанай қаласының жастар мәслихатының депутаты Арман Бисембаев жастарды сайлауға баруға, еліміздің болашағы үшін игі қадам жасауға шақырды.