Baitursynuly University командасы өздері әзірлеген бірқатар технологиялық жобаны ұсынды. Форум Astana IT University алаңында өтіп жатыр.
Форум аясында жасанды интеллект пен цифрлық технологиялар саласындағы перспективалы жобаларды біріктірген «AI Sana» арнайы көрмесі ұйымдастырылды. Көрмеге ҚӨУ студенттері де қатысып, заманауи технологиялардың білім беру, мәдениет және агроөнеркәсіптік кешен салаларындағы практикалық қолданысын көрсетті.
Көрме барысында ҚӨУ студенттерінің бес жобасы сарапшылар мен форум қатысушыларының назарына ұсынылды:
AI Mektep — жасанды интеллект мүмкіндіктерін пайдалана отырып, оқу үдерісін жетілдіруге және автоматтандыруға бағытталған интеллектуалды білім беру платформасы. Жоба білім беру жүйесіне заманауи цифрлық құралдарды енгізуге мүмкіндік береді.
Tutor KSU — студенттерге арналған дербес интеллектуалды тьютор. Жүйе білім алушыларға оқу үдерісінде қолдау көрсетіп, қажетті ақпаратты ұсынуға және жасанды интеллект технологиялары арқылы жеке қажеттіліктеріне сай сүйемелдеуге арналған.
VR «Ұлттық спорт түрлері» — дәстүрлі қазақ спорт түрлерімен интерактивті цифрлық ортада танысуға мүмкіндік беретін виртуалды шынайылық жобасы. Жоба заманауи VR технологияларын ұлттық мәдени мұраны насихаттау және сақтаумен ұштастырады.
AR «Әліппе» оқулығы — толықтырылған шынайылық технологиясы негізінде әзірленген жаңа буынның интерактивті оқу құралы. AR технологиясының көмегімен дәстүрлі оқулық материалдары цифрлық контентпен толықтырылып, оқу үдерісі көрнекі әрі интерактивті бола түседі.
Өсімдік ауруларын анықтау жүйесі — компьютерлік көру және жасанды интеллект технологиялары негізінде әзірленген жоба. Жүйе ауыл шаруашылығы дақылдарының ауруларын автоматты түрде анықтауға мүмкіндік береді. Жобаны дәлме-дәл егіншілік пен агроөнеркәсіптік кешенді цифрландыру салаларында қолдануға болады.
Ахмет Байтұрсынұлы атындағы Қостанай өңірлік университеті студенттерінің AI & Digital Bridge 2026 халықаралық форумына қатысуы — университетте әзірленген жобаларды кәсіби ортаға таныстыруға, IT-индустрия өкілдерімен тәжірибе алмасуға және студенттік жобалардың практикалық әлеуетін көрсетуге мүмкіндік берді.
Мұндай бастамалар студенттердің жобалық және зерттеу жұмыстарына қызығушылығын арттырып, жасанды интеллект, виртуалды және толықтырылған шынайылық, компьютерлік көру және басқа да перспективалы цифрлық технологиялар бағытындағы құзыреттерін дамытуға ықпал етеді.
ҚӨУ командасына университет ректоры Сеитбек Қуанышбаев қолдау көрсетті.
Ахмет Байтұрсынұлы атындағы Қостанай өңірлік университеті студенттердің технологиялық бастамаларын дамытуға және олардың әзірлемелерін Қазақстанның заманауи цифрлық экожүйесіне енгізуге қажетті жағдай жасай бермек.
