«Медиадискурс және білім беру: университет сайттарының лингвистикалық дизайны» атты конференцияға Қазақстан, Ресей, Әзербайжан, Өзбекстан және алыс шетелден дискурсология саласындағы жетекші зерттеушілер, тілдік технология сарапшылары мен жас ғалымдар қатысты.
Ауқымды ғылыми форум ҚР Ғылым және жоғары білім министрлігінің Ғылым комитеті қаржыландыратын AP23485644 «Қазақстан университеттерінің тартымдылығын арттыру: шетелдік жоғары оқу орындары веб-сайттарының әлеуметтік-мәдени диспозитивтерін талдау арқылы дискурс стратегияларының тиімді үлгілерін әзірлеу» ғылыми-зерттеу жобасы аясында ұйымдастырылды. Жобаға филология ғылымдарының докторы, ҚӨУ оқытушысы Наталья Монгилёва жетекшілік етеді.
Конференция жоғары білім беруді цифрландырудың өзекті үрдістерін, жасанды интеллектінің медиакоммуникациядағы рөлін, сондай-ақ заманауи университеттердің имиджін визуалды және тілдік тұрғыдан қалыптастыру мәселелерін талқылайтын маңызды ғылыми алаңға айналды.
Іс-шараның жоғары академиялық деңгейін отандық және әлемдік лингвистика саласында мойындалған ғалымдардың пленарлық баяндамалары айқындады.
Конференцияның басты ерекшеліктерінің бірі – оның интерактивтілігі мен жастардың белсенді қатысуы болды.
Филология ғылымының белгілі ғалымдарымен қатар магистранттар мен докторанттар да мазмұнды ғылыми баяндамалар жасап, зерттеу мәдениеті мен заманауи әдістемелік құралдарды меңгерудің жоғары деңгейін көрсетті.
Секциялық отырыстарда веб-ресурстарды лингвистикалық модельдеуден бастап медиадискурстағы ақпараттық-психологиялық қауіпсіздік мәселелеріне дейінгі кең ауқымды тақырыптар қамтылды.
Кездесудің басты нәтижесі – гранттық зерттеу жұмысының қорытындыларын шығару ғана емес, жаңа халықаралық академиялық бастамаларға жол ашу болды.
Атап айтқанда, конференцияға қатысушылар жетекші серіктес жоғары оқу орындарының сайттарына салыстырмалы кросс-мәдени талдау жүргізуге негіз қалады.
Конференция материалдары жедел рецензиялаудан өтіп, ғылыми еңбектер жинағы жарық көрді. Жинақ университеттің ресми сайтында қолжетімді. Ал қатысушылардың негізгі зерттеулері дәстүрлі түрде «3i» академиялық журналының беттерінде жарияланады.
Ұйымдастыру комитеті барлық спикерлерге, жарияланым авторларына және қонақтарға ғылыми қолдауы, мазмұнды пікірталас пен қазіргі филологиялық білімнің дамуына қосқан бағалы үлесі үшін шынайы алғыс білдіреді.
